O Principado de Asturias dispondrá dunha red propia de difusión da TDT

O Goberno do Principado destinará 35 millóns de euros á construción dunha rede propia para a difusión do sinal da Televisión Dixital Terrestre (TDT) que permitirá estender a toda a Comunidade este servizo que será obrigatorio a partir do 3 de abril de 2010.

Os 35 millóns de euros de investimento serán achegados polo Ministerio de Industria a través da secretaría de Estado de Telecomunicacións e para a Sociedade da Información mediante un préstamo a quince anos sen intereses, informa o Goberno asturiano.

A nova rede, ademais de ser soporte para o transporte do sinal de TDT, permitirá a difusión do sinal de servizos de seguridade e urxencia así como a extensión da banda ancha a zonas rurais como complemento ao Plan de Extensión de Banda Ancha (PEBA) do Ministerio.

O acordo para o financiamento desta rede aprobouse onte na reunión da Conferencia Sectorial de Sociedade da Información celebrada en Madrid e á que asistiron a Conselleira de Administracións Públicas e Portavoz de Goberno, Ana Rosa Migoya, e o director xeral de Modernización, Telecomunicacións e Sociedade da Información, Alberto Pérez Cueto.

O Plan Técnico Nacional de TDT esixe que os operadores nacionais de radiodifusión alcancen en 2010 coberturas do 96% (privados) e 98% (públicos), aínda que estas son de cómputo estatal.

No caso de Asturias, a orografía e a dispersión da poboación disparan os custos e dificultan que a iniciativa privada chegue a todos os sitios.

Na reunión á que asistiron os representantes de todas as comunidades e estivo presidida polo Ministro de Industria, tamén se aprobou unha achega ministerial de seis millóns de euros para o desenvolvemento do Plan Avanza durante 2008.

Fonte: lne.es